Þriðji leikur Stjörnunnar og Val fór fram í Vodafonehöllinni 21. apríl sl. Sólveig Lára var fjarri góðu gamni og eftir að hafa tapað tveimur fyrstu leikjunum var fremur lítill vonarneisti í hjörtum leikmanna og áhangenda, enda byrjaði leikurinn skelfilega. Stjarnan náði t.a.m. ekki að skora mark fyrr en á elleftu mínútu og þá var staðan orðin 6-1 og augljóst í hvað stefndi. Stjörnunni gekk afar illa að stöðva fyrrum leikmann Stjörnunnar Þorgerði Önnu sem raðaði 9 mörkum í netið í fyrri hálfleiknum. Hriplekri vörn fylgdi lítil markvarsla og engin hraðaupphlaup litu dagsins ljós á þeim tíma. Staðan í hálfleik 19-6 og formsatriði að klára leikinn.

Í seinni hálfleik róaði Stjarnan óknarleik sinn og gekk betur að koma tuðrunni í net andstæðinga sinna en varnarleikurinn var enn fremur máttlítill. Liðið náði þó að halda sjó nokkurnvegin í hálfleiknum með tiltölulega fáum tæknifeilum og öguðum sóknarleik en úrslitin voru ráðin eins og áður sagði. Lokatölur 39-23.

Skotnýting Stjörnunnar var 41% og sóknarnýting 34 %.

Markaskorarar: Jóna 10, Ali 3, Esther2, Hanna 2, Sandra 2, Helena 1, Hildur 1, Rut 1 og Arna 1 mark.

Helga varði 7 skot og þar af fóru 2 aftur til mótherja. Kristín varði 1 skot sem fór til baka.

Þetta var því síðasti leikur liðsins þetta keppnistímabil. Tímabils sem verður kannski helst minnst fyrir það að liðið var hársbreidd frá því að draga sig úr mótinu fyrst í haust. Árangur liðsins var 4. sæti í deildarkeppnini, töpuðu í 4-liða úrslitum gegn Val í Bikarkeppninni og urðu í 3-4 sæti á Íslandsmótinu í úrslitakeppninni. Liðið markaði eiginlega ekkert gegn sterkari liðinum, hélt jöfnu gegn HK en vann liðin fyrir neðan nokkuð örugglega.  Vonandi verður næsti vetur betri og uppskeran ríkulegri en til þess að svo megi verða þarf ýmislegt að breytast til batnaðar....en við horfum auðvitað bjartsýn fram á veg og stefnum upp á við. Ég þakka þeim sem nennt hafa að lesa greinarnar mínar í ár og undanfarin misseri. Með kveðju Anna Þóra

Annar leikur Stjörnunnar og Vals var leikinn í Mýrinn á laugardag.

Stjarnan byrjaði með hörkuvörn og með Helgu dóru í miklum ha fyrir aftan. Valsstúlkur virtust einnig fremur áhugalitlar í byrjun leiks og gerðu urmul af tæknifeilum. Stjarnan náði því undirtökum til að byrja með og leiddi eftir 16 mínútna leik 8-4. Þá kom slæmur kafli hjá Stjörnunni sem átti erfitt uppdráttar í sókninni og fékk á sig hraðaupphlaupsmörk í hrönnum og þegar flautað va til hálfleiks var staðan 10-13 þrátt fyrir mjög góða markvörslu Helgu Dóru.

Helga Dóra hélt uppteknum hætti í byrjun hálfleiks með því að verja vítakast en það dugði lítið til sóknarleikur sStjörnunnar var mjög brokkgengur og Valsstúlkur áttu ekki í vandræðum með að nýta sér það og juku muninn jafnt og þétt og náðu mest 11 marka forystu 13-24. Stjarnan náði að laga Stöðuna í lokin og því varð sigur gestanna mun minni en á fimmtudaginn. Lokatölur 18-26. Skotnýting liðsins var 42% en sóknarnýting bara 28 % þar sem tæknifeilar voru 21 talsins. Langbesta leik Stjörnustúlkna átti Helga Dóra að þessu sinni og bjargaði liðinu algerlega frá mun stærra tapi.

Markaskorar Stjörnunnar: Solla 6, Hanna 5, Hildur 2, Jóna 2 (1 v) , Esther 1, Rut 1 og Helena 1 mark.

Helga Dóra varði 20 bolta og þar af fóru 7 aftur til mótherja. Kristín varði 1 bolta.

Þriðji leikur liðanna verður á þriðjudag í Vodafonehöllinni klukkan 19:30.

Stjarnan hélt á Hlíðarenda í kvöld og lék gegn ríkjandi Íslands- deildar og bikarmeisturum Vals í fyrsta leik undanúrslitanna.

Valur gaf tóninn strax í fyrstu sókn og skoraði gott mark en Stjarnan jafnaði en það stóð ekki lengi því Valur skoraði þrjú næstu mörk og leiddi 4-1 eftir þriggja mínútna leik. Þessi rythmi hélst nætu mínúturnar og um miðjan hálfleik var staðan 14-7 og þegar níu mínútur voru eftir var staðan orðin harla vonlaus eða 18-8. Þá tók Stjarnan leikhlé og breytti aðeins leikskipulaginu. Það virkaði nokkuð vel og náði liðið á laga stöðuna nokkuð fyrir leikhlé en þá leiddi Valur með sjö mörkum 19-12. Eins og sést á þessum tölum var varnaleikur liðsins ekki upp á marga fiska en að auki hafði Jenný markvörður Vals reynst Stjörnunni erfiður ljár í þúfu með 16 skot varin.

Valur byrjaði heldur betur í seinni hálfleik og jók muninn fyrstu sex mínúturnar í 23-14 en þá kom ljómandi kafli ( alltof stuttur, því miður) þar sem Stjarnan náði að minnka muninn í 23-17 en þá skall allt aftur í baklás og um miðjan hálfleik var staðan 28-18. Þá kom aftur ágætis kafli og Stjarnan skoraði þrjú í röð og minnkaði aftur muninn í 28-21. Seinustu tíu mínútunar fékk varamannbekkurinn á spreyta sig og svo fór að lokum að Valur vann með tólf mörkum 36-24 og leiðir í einvíginu 1-0. Skotnýting Stjörnunnar var afar slök eða 43% og sóknarnýting 35%. Markverðir Vals vörðu eina 26 bolta í leiknum og þar af fóru 4 þeirra til baka.

Markaskorar Stjörnunnar: Jóna 7 (2v), Rut 4, Hanna 3, Esther 3, Sandra 3, Solla 3 og Þórhildur 1 mark.

Kristín varði 8 skot í markinu og fór 1 til baka. Helga Dóra varði 2 bolta.

Nú er það bara næsti leikur í Mýrinni á laugardaginn og vonandi nær liðið að sýna jafnari og betri leik þá. Áfram Stjarnan!

Undirrituð var því miður fjarri góðu gamni í leiknum í dag en lét vakta textavarpið reglulega og kættist yfir góðri stöðu í hálfleik og nokkuð öruggum sigri þegar upp var staðið. Á þessum link má sjá umfjöllun Sportsins um leikinn http://www.sport.is/handbolti/2012/04/14/n1-deild-kvenna-stjarnan-i-undanurslit-eftir-sigur-a-hk/

Rimman við Val byrjar á fimmtudaginn í Vodafonehöllinni klukkan 19:30. Þangað mætir allt Stjörnufólk auðvitað og hvetur stelpurnar til sigurs. Koma svo - Áfram Stjarnan !

Fimmtudagskvöldið 12. apríl hófst úrslita keppnin - eða öllu heldur keppnin um að spila til úrslita gegn tveimur efstu liðunum Val og Fram. Stjarnan hafði öðlast heimaleikjarétt gegn HK og því mættust liðin í fyrsta leiknum í Mýrinni. Alina var með á ný – þó stutt sé síðan hún eignaðist drenginn sinn og var verulega ánægjulegt að sjá hana í miðju varnarinnar.

HK stúlkur settu fyrsta markið en Stjarnan jafnaði nánast um leið. Næstu mínútur skiptust liðin á mörkun g var nánast jafnt á öllum tölum þar til eftir 20 mínútna leik en þá var staðan 10-10. Góður leikkafli skilaði Stjörnunni þriggja marka forskoti 13-10 þegar fimm mínútur voru eftir en þá tók HK leikhlá og náðu að minnka muninn í eitt mark fyrir hálfleik 15-14. Ólöf Kolbrún markvörður HK var í miklu stuði í hálfleiknum og varði ein 14 skot, flest úr dauðafærum og þar af fóru 4 aftur til mótherja.

Seinni hálfleikur byrjaði ekki vel fyrir Stjörnuna. Vandræði voru í sóknarleiknum og gengu HK stúlkur á lagið og skoruðu grimmt og komust yfir 17-20 eftir 6 mínútna leik. Þá fóru Stjörnustelpur loksins að sýna sitt rétta andlit og með yfirveguðum og tæknifeilalitlum leik náðu þær að snúa leiknum aftur sér i hag og jöfnuðu 22-22 á tólftu mínútu. Jafnvægi var á leik liðanna næstu mínútur þar sem Ólöf hélt áfram uppteknum hætti í HK- markinu og varði eins og berserkur - í heild 24 skot (og bara 4 til baka). Þá kom góður kafli í markinu hjá Helgu Dóru og gripu Stjörnustelpur tækifærið og náðu að búa til þriggja marka forskot 29-26 þegar sjö mínútur voru til hálfleiks. Þessi munur hélst það em eftir var og fögnuðu Stjörnustúlkur sætum sigri 32-29 í miklum spennuleik og hafa tekið forystu í einvíginu 1-0. Til gamans má geta þess að tæknifeilar voru einungis 5 í hálfleiknum og er það með því minnsta sem ég hef skráð hjá liðinu í vetur.

Skotnýting liðsins var þrátt fyrir mikla markvörlsu 60% og sóknarnýting 48%.

Markaskorar Stjörnunnar: Hanna 9, Solla 7, Jóna 6 (4v), Hildur 4, Þórhildur 4, Esther 1 og Rut 1 mark.

Helga Dóra varði 10 skot í markinu og þar af fóru 2 aftur til mótherja. Kristín varði 5 skot og þar af fór 1 aftur til mótherja.

Næsti leikur er í Digranesinu á morgun klukkan 16:00 og nú mæta allir sem vettlingi geta valdið og styðja við bakið á stelpunum með hrópum og köllum – Áfram Stjarnan!